Kubana au kufinya chunusi (pimples) kunaweza kuonekana kama njia rahisi ya kuondoa tatizo, lakini wataalamu wa afya wanashauri watu kuepuka kufanya hivyo, hasa katika eneo linalojulikana kama “triangle of death” au “pembetatu ya kifo”.
Eneo hili huanzia kwenye pembe za mdomo na kuendelea hadi kwenye daraja la pua. Ingawa chunusi zinazotokea hapo mara nyingi huonekana kuwa za kawaida, kuzibana kunaweza kuongeza hatari ya maambukizi.
Hii ni kwa sababu eneo hilo lina mishipa ya damu inayoungana na mishipa ya ndani iliyo karibu na ubongo. Baadhi ya mishipa hiyo pia haina valvu zinazosaidia kudhibiti mwelekeo wa mtiririko wa damu.
Kwa kubana chunusi, bakteria wanaweza kusukumwa ndani zaidi ya ngozi, jambo linaloweza kuongeza uwezekano wa maambukizi kuenea katika maeneo mengine.
Badala ya kuzibana, wataalamu wanashauri kuacha chunusi bila kuzichezea na badala yake kusafisha uso kwa kutumia kisafishaji laini cha ngozi. Bidhaa zenye asidi ya salicylic pia zinaweza kusaidia kwa kuondoa mafuta na seli zilizokufa zinazoweza kuziba matundu ya ngozi na kuchangia kutokea kwa chunusi.
Hata hivyo, mtu akiona eneo hilo linaanza kuvimba sana, kuwa jekundu au kusababisha maumivu makali, anashauriwa kutafuta ushauri wa mtaalamu wa afya. Uchunguzi wa mapema unaweza kusaidia kubaini kama kuna maambukizi na kuhakikisha anapata matibabu yanayofaa.
Pia unaweza kutazama video